Аль ч улс үндэстэн, овог угсаатны дунд хуримын зан үйлийн аман зохиол нь чухал байр суурийг эзэлдэг. Учир нь улс орон, нутаг усанд нэгэн голомт шинээр нэмэгдэж, ах дүүс, амраг саднаараа цуглан, шинэ айлыг ёслол төгөлдөр зарлан тунхаглаж, амьдралд нь алив сайхнаа хүсэн ерөөдөг хуримын зан үйлийн аман зохиол болбоос тухайн үндэстэн, угсаатны соёл, уламжлалын чухал нэгэн өв, цаашлаад оршин буй хүний нийгмийн чухал нөлөө болох юм.